صلاح دندش يكتب : منصور ابن الناظر

فجأة خرج علينا مسئول اللجنة الأوليمبية المصرية بتصريح عنترى جدا يؤكد فيه أن لجنة تقصى الحقائق قالت مفيش شبهة إهدار مال عام فى اللجنة الأولمبية، وأن وزير الرياضة قال مفيش مخالفات ولا تحويل للنيابة .. وأعاد تأكيده أن كل شيء واضح وسليم ولو فى أى حاجة احنا جاهزين للتحقيق لأن معندناش حاجة غلط .. وهنا كان لابد البحث والتدقيق عن سر خروج هذا التصريح الذى تتذكر من خلاله الراحل إسماعيل يس فى فيلم ( ابن حميدو ) بجملة ( فتشنى فتش .. والنبى فتش) وكاد حطب أن يحلف بأغلظ الأيمان أنه برىء ومش متورط فى شيء .. طيب ممكن سؤال رفيع أوى لحطب باشا ..هل تقرير لجنة تقصى الحقائق حضرتك شفته.. وقرأت ما يؤكد صراحة إنه كله تمام والورق مظبوط والحسابات والقرارات قانونية .. طيب ممكن لو سمحت .. بعد اذنك .. تتفضل وتتكرم وتبعت للسادة الصحفيين الوحشين ( أنا منهم !) اللى بيقولوا إن تقرير الجهاز المركزى بيدين اللجنة الأولمبية وإن عندكم مخالفات واهدار مال عام .
* الطريف أنه منذ فترة طويلة خرجت اللجنة ببيان محدش فهم منه حاجة على طريقة ( منصور ابن الناظر) فى مدرسة المشاغبين ( مش بيجمع! ) وكان يحتاج إلى مترجم لفهم عاوز يقول إيه من الكلام المكرر المعاد فى نفس البيان .. ولكنه صدم بتصريح لرئيس اللجنة الطبية افحمه وجعله محتار خالص .. وقال إنه مفيش تعليق للمباريات بالصالات .. فعاد ابن الناظر وأصدر بيانا جديداً وقال كلام كتير والله مافهمت منه حاجة برضه .. وكأنه ( يبلل الماء بشوية مية مبلولة ).
*العنترية وفرد العضلات لها ناسها مش أى حد يخرج يقول ( أنا عتريس ..ومش بتخافوا منى ليه ؟) وللحق أن الوصول لكرسى المسئولية فى أى منصب لابد قبل أن ننتخب أحد أن نستمع له يتكلم أولا حتى نكتشف هنفهم منه حاجة ولا لأ ؟ لأنه أمر صعب أن تظل تبحث عن مترجم يشرح لك ماذا يقصد المسئول .
* الحياة أصبحت لاتحتاج صراع المناصب والمال والسلطة بل تحتاج طهارة يد وقلب وتقرب إلى الله .. يارب ارفع عنا البلاء والوباء والداء.

شاهد أيضاً

ياسر تهامى يكتب: كورونا حدث 2020

يترقب عشاق كرة القدم خاصة والرياضة بصفة عامة نهاية العام الحالي بعد ساعات ليسدل الستار …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.